ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន ទើបតែចុះហត្ថលេខាលើតារាងភាគនៃប្រាក់ចំណូលជាប់ពន្ធប្រចាំឆ្នាំ និងតារាងភាគនៃប្រាក់បៀវត្សជាប់ពន្ធប្រចាំខែដែលបានកំណត់តម្លើងអត្រារួចពន្ធ ២លានក្នុងមួយឆ្នាំសម្រាប់ចំណូលរបស់អ្នករកស៉ី ឬសមាជិកភាគហ៊ុន និង២ម៉ឺនរៀលសម្រាប់ប្រាក់បៀវត្សប្រចាំខែ។
ការកំណត់ថ្មីនេះបានធ្វើឲ្យម្ចាស់សហគ្រាស ឬសមាជិកដែលមិនមែននីតិបុគ្គលដែលរកចំណូលបានត្រឹម ១៨លានរៀលក្នុង១ឆ្នាំត្រូវបានរួចពន្ធ ខណៈអ្នកដែលមានប្រាក់បៀវត្សចាប់ពី ០រៀល ដល់ ១លាន ៥សែនរៀល ក៏ត្រូវរួចពន្ធដូចគ្មា។
យោងតាមតារាងភាគនៃប្រាក់ចំណូលជាប់ពន្ធប្រចាំឆ្នាំ និងតារាងភាគនៃប្រាក់បៀវត្សជាប់ពន្ធប្រចាំខែដែលចុះហត្ថលេខាដោយ សម្ដេចតេជោ ហ៊ុន សែន កាលពីថ្ងៃពុធ ទី២៨ ខែកញ្ញាម្សិលមិញ បានកំណត់ថា និយោជិតដែលមានប្រាក់បៀវត្សចាប់ពី ១លាន ៥សែន ១រៀល ដល់ ២លានរៀល ត្រូវជាប់ពន្ធ ៥% ហើយអ្នកដែលមានប្រាក់ខែចាប់ពី ២លាន ១រៀល ដល់ ៨លាន ៥សែនរៀលត្រូវជាប់ពន្ធ ១០%។
សម្រាប់អ្នកដែលមានប្រាក់ខែចាប់ពី ៨លាន ៥សែន ១រៀល ដល់ ១២លាន ៥សែន ត្រូវជាប់ពន្ធ ១៥% និងអ្នកដែលមានប្រាក់ខែលើសពី ១២លាន ៥សែននឹងត្រូវជាប់ពន្ធ ២០%។
ការកំណត់នេះគឺបានលុបចោលតារាងចាស់ដែលអនុវត្តតាំងពីឆ្នាំ២០២០ មកផងដែរ៕